کابل:- د جمهوری ریاست د یوې خبر پاڼې پر اساس، جمهور رييس حامدکرزي د پنجشنبې په ماښام دويديو کنفرانس له لارې دهغه کنفرانس له ٢٥٠ برخه والو سره خبرې وکړې چې دامريکا په دالاس ښار کې دجورج ډبليو بوش د انستيتوت له خوا جوړ شوى دى .

خبر پاڼه زیاتوی چې ددغه دوه ورځني کنفرانس دخبرو محور چې دافغانستان دراتلونکي دجوړولو ، د ښځو دآزاديو دپرمختګ او هغوى ته داقتصادي فرصتونو دبرابرولو تر عنوان لاندې جوړ شوي و ، دښځو دازاديو ملاتړ او هغوى ته داقتصادي فرصتونو برابرول دي . دافغانستان داسلامي جمهوريت جمهور رييس په خپلو خبرو کې په سياسي ، اقتصادي او ټولنيزو برخو کې دښځو دمشارکت په بيانولو سره وويل : په تيرو لسو کلونو کې دافغانستان دحکومت يو مهم برياليتوب په بيلابيلو برخو کې دښځو دونډي زياتيدونکي وده ده چې د نړيوالې ټولنې په مرسته ، دحکومت په پاملرنې او دافغان ښځو په ميړانې سره ترلاسه شوي دي . جمهور رييس زياته کړه نن په سلو کې ٢٨ دافغانستان د پارلمان غړي ښځې دي او په سلو کې څلويښت دافغانستان درسنيو کارکوونکي ځوانې نجونې دي چې په مينې سره کار او فعاليت کوي .

جمهور رييس دسولې په عالي شوراکې دښځو دمشارکت په بيانولو سره وويل ( ښځې دسولې په بهير کې چې دافغانستان دحکومت په نوښت پيل شوى دى . ارزښتناکه ونډه لري او ټولې يې په عمومي ډول هيله لري چې په يو آرام افغانستان کې او په سوله ئيزه فضا کې ژوند وکړي او هيله لرم ددغې شورا دهلوځلو له لارې چې اته ښځې پکې غړيتوب لري ، هميشنۍ سولې ته ورسيږو . جمهور رييس دخپلو خبرو په دوام ټينګار وکړ چې دسولې دخبرو په بهير کې دښځو رول او دهغوى لاس ته راوړنې په پام کې نيول کيږي او هيڅ سوله د ښځو له رول پرته او دهغوى دلاس ته راوړنو په پام کې نه نيولو سر ه دافغانستان ملت ته دمنلو وړ نه ده . دغه راز جمهور رييس څرګنده کړه : دښځو دحالت او هغوى ته په ټولو برخو کې دښو شرايطو دبرابرولو په لاره کې به دتيرو لسو کلونو په شان دافغانستان د حکومت هلې ځلې همدغه شان دوام وکړي .

ديادونې وړ ده ، دامريکا د پحواني جمهور رييس جورج ډبليو بوش ميرمن لورا بوش چې په افغانستان کې دښځو د حقوقو يوه ملاتړې ده . ددغه کنفرانس کورتوب په غاړه لري او په هغه کې دامريکا په پخواني جمهور رييس جورج ډبليو بوش سربيره يو شمير حکومتي مقامات ،دامريکا سوداګراو دغيرانتفاعي موسسو استازي او يو شمير افغان ښځې برخه لري .